Les for livet! - IRIS - Samfunn og Næringsutvikling

Les for livet!

Dette er eit samarbeidsprosjekt mellom Suldal kommune og IRIS under skoleutviklingsprogrammet Kunnskapsløftet – fra ord til handling.

Kommunen ønskjer å sette fokus på tidleg innsats når det gjeld språkstimulering og lesedugleik. Slik kan barna få eit best mogleg verktøy for læring gjennom heile utdanningsløpet, og oppleve meistring og bli motiverte for læring. Prosjektet har både eit pedagogisk og eit organisatorisk hovudmål.

Det pedagogiske hovudmålet dreier seg om å få til betre systematikk og meir målretta arbeid med språkutvikling og leseopplæring i barnehagen og skulen. Barnehagane og skulane skal utvikle og innføre eit system for målretta arbeid med språkstimulering og leseopplæring, med rutinar for å fange opp barn som treng ekstra oppfølging og system for kva tiltak som skal setjast inn.

Skulane har valt å ta i bruk verktøyet "SOL" (systematisk observasjon av lesing) som Gjesdal kommune har utvikla. Dette systemet omfatter både kartlegging og oppfølging av elevane sin lesedugleik. For å kunne fange opp barn som treng oppfølging og sette inn dei rette tiltaka, er det nødvendig at heile personalet i barnehagane og skulane har god teoretisk og metodisk kompetanse om språkutvikling og lesing. Kompetanseheving blir difor viktig.

Det organisatoriske hovudmålet går ut på å utvikle felles forståing og kultur mot barnas språkutvikling gjennom meir samarbeid på tvers av trinnene i skolen og mellom barnehagane og skulane. Kommunen har i dag ein plan for overgang barnehage - skule, men det er behov for å bli meir kjent med den andre arenaen sin pedagogiske praksis.

For at barna skal få ei så god stimulering og opplæring som mogleg, er det viktig at personalet i barnehagane og skulane får betre kjennskap til kvarandre sitt arbeid, slik at det kan bli meir heilskap i opplæringa som gjeld språkstimulering og lesing. Det skal etablerast arenaer på ulike plan der ein kan møtast og utveksle kunnskap og erfaring. Biblioteket er også med i prosjektet.

IRIS skal hovedsakelig bidra til organisatorisk utvikling i prosjektet. Lesesenteret ved Universitetet i Stavanger skal bidra til faglig utvikling.

Print page